عايز اغير جو , او اغير ارض!!

أستيقظ من نومي علي كابوس مفزع..

"خير اللهم اجعله خير"

-لا دا بقي العادي بتاعي-

أرتدي ملابسي واخرج من بيتي , اسير في ارض الله.

في الشارع اقابل وجوه الناس التي تعلن بكل ملامحها عن الحزن والكابة اللي بيعيشوا فيها

-قررت عدم النظر الي اي وجه انساني من النهاردة-

أصل كُليتي اسمع الكل يشكو من الدراسة والضغط العصبي اللي بيعاني منه اي طالب وخصوصا في كليتنا

-امتحانات بقي-

اقابل اصدقائي واسمع مصائبهم ومشاكلهم

-نفسي اقابل حد حياته مفيهاش مشاكل , فضول مش اكتر-

اتجه للمستشفي ومرة اخري انظر في وجوه الناس

-غصب عني منا مش همشي مغمضة-

مرضي يتألمون أو أهالي مرضي يتألمون أيضاً حتي أنك تتخيل ان الناس كلها مريضة

-تنعكس عليّ كل اه اسمعها وكأنها اهاتي-.

اخرج من المستشفي , اركب المترو حيث تحلو الحكايات وخاصة بعربة السيدات , الكل يشكو والكل يتعجب مما حدث ومما يحدث ونظرة بائسة تنهي الحديث بين اي اتنين

-ارفض الدخول في اي حديث مع غرباء مهي مش ناقصة-.

اجري لاختبئ بمنزلي

-من خرج من داره-

اسمعهم يتكلمون عما حدث من سرقات ومشكلات وازمات

اسمع نشرة الاخبار قتل وحروب ودمار , مظاهرات وتهديدات

-وكله طبعا مدعم بالصور والفيديو-

اتناول الجريدة لاتصفحها : مصرع واصابة وضحايا سرقة وقتل واغتصاب و..

-هي الدنيا جري فيها ايه-

حتي علي النت لا اتصفح مدونة الا ووجدتها تستغيث , وتشجب وتندد وتلعن او تنتحب

-فيه موضوعات من قوتها لما بقراها بابكي داخليا

امسك قلمي لاكتب فلا يكتب الا عن احداث اليوم السابقة

-هي فعلا "احداث"-

وحتي لا اكتئب -علي اعتبار اني لسة ما اكتئبتش- اهرب الي النوم

فاجد الكوابيس في انتظاري..

كوابييييييييييييييييييييييييسي وحشتوني

طيب اروح فييييييين؟؟؟!!!

امنية:

باتمناها كل يوم قبل ما اغمض عنية وانام , اخد الدنيا في ايدي نصفها في كفي اليمين ونصفها في كفي الشمال وحد يحدفني لفوق زي زمان واطير لفوق واخدها معايا لفوق , لفوق قوي .. ولما انزل اقع وافتح كفوفي واسيب كل المشاكل تطير من كفوفي وانا نازلة تطير لفوق كل المشاكل اللي موجودة في الدنيا وما يبقاش بكفي غير الدنيا وانزل بدنيا جديدة , ارض جديدة وناس جديدة وحياة جديدة مفيهاش نقطة حزن.

هي الناس لما بيبقوا زيي بيروحوا فييييين صحيح؟؟