أواخر الشتا وعمايله

سنووايت تعود من جديد

بعد صراع حاد اسفر عن مصرع 15 فيروس و20 بكتيريايا و10 كائنات دقيقة غير معلومة الصنف.

وطبعا المتهم الأول في القضية هو الجو وتقلباته واه من تقلبات الجو مهو يا شتاء شتاء يا ربيع ربيع الجو الشتربيعي دا ما بحبوش.

والمتهم التاني طبعا جهاز مناعتي الضعيف المتسيب واللي هيضيعني معاه واللي بينفذ حاليا فترة عقوبته عن التسيب اللي عمله ونيمني 3 أيام في السرير لا أقوي حتي علي شرب كوب المياه.

الحمدلله تقريبا عادت المياه لمجاريها ورجعت الحياة تدب في عروقي بعد ما كنت كالوسادة التي انام عليها , والحقيقة لم أكن سنووايت فقد ذاب "السنو" و"الوايت" بقي "ريد" من جراء حرارتي المرتفعة.

3 ايام وهم أسرع 3 ايام مروا عليّ في حياتي , لم أشعر بهم علي الاطلاق , كأني نمت الثلاثاء الظهر واستيقظت الثلاثاء المغرب وليس الخميس.

الصحة كنز لا يقدر بثمن . الحمدلله عليها , انا عارفة اني قلت الموضوع دا كتير وفي بوستات قبل كدة بس الموضوع دا مهم بالنسبة لي جدا ومأثر فية جداً , فلا اتخيلني يوم بدون صحتي , من مجرد التهاب في الشعب الهوائية تعطلت حياتي بالكامل 3 ايام فما بالكم بما هو اخطر من ذلك!!

ومن هنا أعلن أن الدنيا لسة مش ربيع والجو لسة مش بديع ومفيش داعي نقفل علي كل المواضيع ولا نقفل علي كل الدواليب ونخفف ملابسنا لان الشتا لسة موجود أم كما تقول اليسا "أواخر الشتا" لسة موجودة

والكلام ليكي يا شهرزاد