ان كان لك عند حد حاجة..

"خد منه وادّحلب معاه"
************
القاعدة دي كانت نصيحة احد اطباء الجراحة للطلبة النهاردة واللي كان بيكلمنا عن امتحان الشفوي , ومعني الجملة انك تكون مع الدكتور في الشفوي زي المركب اللي في وسط البحر وبتروح مع الرياح يمين وشمال, يعني تحس ان الدكتور عاجبه الكلام في الجزء دا اتكلم فيه حسيت انه اتنرفز ومش مقتنع اوعي تتمسك برأيك وتعند معاه, ودا طبعا لوجود اختلافات واراء في بعض الحالات في الطب زي في اي علم تاني , ومطلوب منك انك تكون مع راي الدكتور اللي بيمتحنك سواء كان هو دا اللي انت مذاكره او لأ علشان "تنول الرضا" وأيضاً "تنال الدرجة"..

هو دا سر النجاح دلوقتي مش بس في الكلية ولكن في الحياة بشكل عام, انك تمشي مع التيار , يقولوا يمين تمشي يمين ولو قالوا شمال تمشي شمال ومش مهم انت شايف ايه ولا انت مقتنع بايه المهم الدكتور اكيد هو اكبر منك ويعرف عنك , حتي لو كان الدكتور اللي جنبه رأيه معاكس مش مهم المهم ان دا الدكتور اللي بيمتحنك ودرجتك في ايديه يبقي لازم يكون رايك من رايه وما تتكلمش ولا تعترض لأنك في نظره مجرد "صرصار" سقط حديثاً في بالوعة العلم.

انا لا أؤمن بالمثل القائل
"ان كان لك عند حد حاجة قوله يا سيدي"
لاني باحس انه دعوة عامة للنفاق واللي انتشرت اوي تحت اسم اخر وهو "الشطارة والفهلوة" فمن يتحكم بمصالحك هو سيّدك . منتهي السلبية
"فانت سيّــــــــــــــــــد نفسك"
وعلشان كدة انا ضد قاعدة "خد منه وادحلب معاه" ومع قاعدة
"رأيك اتمسك بيه ولو هتاخد صفر عليه".

ومن الاقوال اللي بارفضها تماما
"امشي جنب الحيط"
لانها بتجعل من الانسان جسد بلا عقل وبلا رأي وبلا حياة وبتحط من قدره وشأنه

"امشي في المكان اللي يريّحك لأن محدش هيريّحك"
و"ان كان لك عند حد حاجة اوعي.. اوعي تقوله يا سيدي"

تذييــــــــــــــل:
**********

فيه أحد الاقوال المأثورة اللي ما اعرفش مين قالها واللي بتقول
"السمك الميّت فقط هو الذي يسبح مع التيار"
فليه نعيش أموات ووهبنا الله نعمة الحياة؟!!