الرباط المُقدس..الرأي والرأي الأخر.!

س: انا خلاص قررت هاتجوز جواز صالونات , عادي زي كل الناس , هاوافق علي العريس اللي بابا جايبه مناسب وجاهز عنده شقة وبيشتغل في مكان كويس ومن عيلة محترمة, انا هأتجوز بعقلي , عقلي وبس , مفيش حاجة اسمها حب , دا وهم , الحب الحقيقي بييجي بعد الجواز والعشرة , أكيد لما اعيش معاه هأحبه, المودة والرحمة هي دي الحب الحقيقي , وبعدين حب ولا مش حب الجواز كله زي بعضه في الاخر , كله محصل بعضه..

---------------------------------
ص: صالونات ايه يا بنتي , ازاي تقبلي تتجوزي واحد لمجرد انه كويس ومناسب وجاهز , ايه اللي هيفرقه عن غيره , لازم لما تختاري شريك حياتك تختاري واحد بالنسبة لك مختلف عن اي حد تاني , لازم تكوني حاسة بيه , لازم يكون فيه حب , حاجة تخليكوا تكملوا مع بعض مهما كانت الظروف , حد تكوني فارقة معاه ويكون هو فارق معاكي ومش مهم اي حاجة تانية..

---------------------------------
ع: صالونات ايه وانتريهات ايه , ايه الكلام اللي انا باسمعه دا , يا جماعة صالونات او غير صالونات المهم يكون فيه قبول , انتوا الاتنين غلط , ما ينفعش تتجوزي واحد لمجرد انه مناسب من غير ما تحسي بأي اختلاف ناحيته يعني زيد زي عبيد, وما ينفعش تتجوزي واحد لمجرد انك بتحبيه لازم يكون فيه بينكم تكافؤ وتكوني مقتنعة بيه , بعقلك وبقلبك , لانك هتعيشي معاه بعقلك وبقلبك..
____________________________________________

_____________________

__________

سَ: خلاص يا جماعة أنا هأتجوز العروسة اللي ماما اختارتهالي , جواز صالونات عادي زي اي حد وزي ما اهالينا اتجوزوا زمان , بنت ناس وكويسة ومفيهاش عيب, و من عيلة كبيرة , هأحتاج ايه اكتر من كدة , أكيد لما اتجوزها هاحبها وبعدين كله جواز في الاخر..

------------------------------------
صَ: صالونات!!! , انت اللي بتقول كدة! , وافرض بعد ما اتجوزتها ما حبيتهاش , لازم تكون بتحبها وهي بتحبك علشان تقدروا تستحملوا الحياة مع بعض , انت مش هتحب كل يوم , مش سهل تلاقي حد تحبه ويحبك , انا مش هأتجوز الا لما اقابل الانسانة دي..

-----------------------------------
عَ: لا كدة يبقي مش هتتجوز خالص , هتفضل مستني ويمكن ما تلاقيهاش , او تلاقيها بعد ما حياتك تكون ضاعت منك وانت مستني , لازم تدّي لنفسك فرصة يمكن تلاقيها في حد ما كنتش متوقعه , يمكن تقابلها في "صالون" من الصالونات زي ما بتقولوا عليه , مش هتفرق تقابلها ازاي وفين , بس مش تعمل زي "سَ" هيروح يبدأ حياته مع واحدة ما يعرفش عنها أي حاجة وما حاولش حتي انه يدي نفسه فرصة علشان يعرفها كويس , انت عايز كرسي تحطه في البيت أو تابلوه تعلقه وتتفرج عليه مش انسانة ليها تفكير المفروض تعرفه ومشاعر المفروض تحس بيها قبل ما تقرر انك ترتبط بيها باقي حياتك..

-----------------------------------

------------

-----
بعيدا عن الأساسيات , الدين والاخلاق و الاحترام والاسرة الطيبة و... و... و...

ثلاثة اراء..

أيهم صحيح , وأيهم خاطيء؟!

هل من الممكن أن يكونوا الثلاثة علي حق؟ ام أن الثلاثة علي خطأ؟

هل انت من مؤيدي الزواج التقليدي او زواج "الصالونات" كما يسمونه , أم من رافعي شعار "الحب" فقط , ام ان لك رأي أخر؟

أي الأراء تختار س , ص أم ع ؟!

علي أي أساس تحبذ اختيار شريك الحياة؟ العقل , القلب , أم الاثنان معا؟
الموضوع مطروح للنقاش , في انتظار أرائكم..

وارجو منكم التصويت في الاستفتاء الموجود في جانب صفحة المدونة

وللحديث بقية ان شاء الله...