احذروا الفيروسات!!

عن رأيها في الفيروسات التي قامت بشن هجوم مفاجيء علي الكمبيوتر وتعطيلها عن أداء مهامها اللعبية تقول "لولو" -ابنة اختي-:

-سنو , الحقي ماما بتقول ان الكمبيوتر عليه فايرس
كانت هذه البداية , ولا تسألوني لماذا دخلت معها في هذا الحوار الفيروسي البحت

--

=طيب وايه المشكلة يا لولو؟

-انا مش عارفة العب "سيمز" , والمرة اللي فاتت الحرامي دخل سرق البيت وكدة مش هأعرف اكمل البيت بتاعي في اللعبة

--
=لولو , هو يعني ايه فايرس؟!
صمتت لبرهة محاولة البحث عن اجابة بعقلها الصغير , ثم اجابتني بكل ثقة محاولة افهامي ما عجزت انا عن فهمه

--

-يا سنو فايرس يعني... يعني... بُصي يعني فايرس كدة بيدخل الكمبيوتر ويبوظه , ويخليني مش اعرف العب عليه
وفي محاولة مني لرسم الجدية علي وجهي واخفاء اي ابتسامات

--
=طيب هو شكله ايه يا لولو؟ يعني زينا كدة وليه عينين وايدين؟!
-لا.. اه.. مش عارفة , اسألي ماما , ماما هي اللي تعرف الفايرس

--
=يعني انتي ما شفتيش فايرس قبل كدة؟
ضحكت بابتسامة خفيفة , تخفي بها احراجها من عدم معرفتها بهذه الأمور , ونظرت بعينيها الي اعلي ثم اجابتني

--
-لا انا ما شفتوش , بس عمو محمد شافه , هو كان معاه فايرس كبيييييير في الشنطة
لم استطع هنا تمالك نفسي خاصة وهي تحاول اخافتي بصوتها وعينيها , فابتسمت علي الرغم مني , ثم تابعت الحديث في اهتمام وشغف بالغين

--
=ايه دا عمو محمد شاف فايرس كبير , هو فيه كبير وصغير يا لولو؟
-ايوة فيه كبير وفيه صغير , احنا عندنا واحد كبير علي الكمبيوتر

--
=طيب يا لولو هو الفايرس دخل ازاي علي الكمبيوتر؟!
-دخل... دخل... هو نط من الشباك كدة ودخل جواه علي طول

--
=هو كمان بينط ! , طيب واحنا ازاي مش بنشوفه
-علشان هو بيدخل بليل واحنا نايمين , بعد ما نقفل الكمبيوتر

--
=طيب هو بيبوظ الكمبيوتر ازاي؟!
-هو بليل بيطلع كدة ويمشي علي الشاشة والكي بورد ويتنطط عليهم ويبوظهم يا سنو

--
=دا فايرس شقي اوي يا لولو, طيب احنا لو عايزين نموته هنموته ازاي؟
-مش عارفة بقي .. وأشارت بكلتا يديها اشارة من لا يعرف

--
=لا لا فكري شوية , نموته ازاي؟
-أسألي ماما ..انتي عارفة , احنا ممكن نروح ونشتري مسدس ونموته بيه كدة ..

--
=بس الفايرس مش بيموت بالمسدس يا لولو , هو احنا شايفينه اصلا وبعدين كدة هنكسر الكمبيوتر
-لا ما هو احنا هنستخبي ونستناه لما يخرج بليل ونموته وهو مش واخد باله

---------------------------------

------------
كانت هذه نهاية أسألتي بعدها , جلست انا ولولو في جلسة سرية وحكيتلها عن الفيروسات وانواعها وكيف ان هناك نوعين من الفيروسات , نوع يصيب البشر "لما بيجيلنا برد" ونوع اخر يصيب اجهزة الكمبيوتر , بالطبع سألتني "ازاي الفايرس بيدخل جسمنا" , فاجبتها اجابة تستطيع ادراكها "بيدخل مع الاكل من بقنا او واحنا بنتفس من مناخيرنا" , "طيب وازاي بيدخل الكمبيوتر" .. وبالطبع افهمتها انه لا يقفز من الشباك وانما هو مجرد ملف "زي الحاجات اللي بتظهر علي الشاشة كدة , او اللي بتفتحي منها الالعاب , وبينزل من علي النت" .

اقتنعت لولو الي حد ما وان كنت اري في عينيها مئات الأسئلة.

___________________________

هذا هو عقل طفل عصرنا الحالي فهو مجبر علي تقبل معلومات عرفها من قبله في اواخر اعمارهم وهو يستقبلها ببداية حياته , فماذا نتوقع من الاجيال القادمة!

اتوقع اجيال ذكية , سريعه البديهة , خيالها اكتروني بحت, عقولها مبرمجة , أبطالهم "سبايدرمان" و"كات وومن" و"المسدس" هو سيد الموقف.

عقول أطفال مبرمجة اكترونيا , ولكنها تفتقد الاحساس بالطبيعة.

..