تاج..كلاكيت تاني مرة

وصلني من فترة تاجين

الأول عن الاحلام من د/هيما والرقيقة نبضات واللي شجعتني أني اجاوب التاج لان في الأول توقفت امام أسئلته وشعرت بصعوبتها نسبيا ولكن هي اللي شجعتني اني اجاوبه.. شكرا د/هيما وشكرا نبضات

التاج التاني من mero .. شكرا ميرو علي اهدائي التاج

________

التاج الأول

"الأحلام هي بذرة الغد , وثمرة اليوم , وعطر الماضي"

5 احلام في الماضي

1-كنت باحلم اني تخلص من المدرسة واطلع من اوائل الجمهورية في الثانوية العامة, وادخل كلية بحبها واتفوق فيها

--

2-كنت باحلم اكون كاتبة كبيرة , او مهندسة ديكور , او مايسترو او فنانة تشكيلية او طبيبة امراض نفسية او عالمة واعمل ابحاث كتير تفيد البشرية.عارفة ان مفيش حاجة منهم ليها علاقة بالتانية بس هي كلها كانت احلام في وقت ما

--

3-كنت باحلم كتير اني اخد كل الناس اللي بحبهم ونروح نعيش علي جزيرة في وسط البحر مفيش فيها اي بشر غيرنا , أو اني اسكن في مدينة ساحلية هادئة علي البحر مباشرة.

--

4-كنت باحلم ان الدراجات تكون وسيلة مواصلات معترف بيها ويبقي من الطبيعي جدا انك تروح بيها الشغل او اي مكان.

--

5-كنت باحلم اطلع القمر زي ارمسترونج كدة واسيب هناك ذكري لية او اني اعمل مغامرة خطيرة في اي مكان غريب وجديد ومختلف , اركب سفينة في محيط , رحلة في الغابات..حاجة كدة.

--

--
5 احلام في المستقبل

1-باحلم تكون عندي مستشفي كبيرة وفيها احدث تجهيزات وتقدم احسن خدمة لكل الناس باسعار غير مبالغ فيها وللغير قادرين مجانا , وان يكتشفوا علاج فعال وسريع لامراض السرطان.

--

2-باحلم اني الف العالم واشوف اكبر عدد من البلاد والشعوب المختلفة لاني مؤمنة ان السفر مش بس فيه 7 فؤائد ولكنه بيسمح لك تتعرف اكتر علي اللدنيا وتعرف ان الكون وااااااسع أوي وانك في وسطه ..لاشيء.

--

3-باحلم اعيش واشوف مصر زي ما باتمني اني اشوفها في يوم من الايام واني افخر اني منها واني بانتمي اليها

--

4-احلم اعيش حياة هادية من غير مشاكل , اكون في صحة كويسة بصحبة ناس باحبهم وفي مكان اكون احبه

--

5-ادخل الجنة بصحبة كل اللي بحبهم وأعرفهم.

--

شخصين غير متواجدين وكنت اتمني وجودهم
مفيش

--
شخصين غير متواجدين وكنت اتمني وجودهم
جدي و جدتي رحمهم الله

****************

التاج التاني

*لو أعطيتك ثلاث وردات من هم الثلاث الأشخاص اللى هتهديهم الورد اللى معاك ؟؟

1-اول وردة "أمي"

2-تاني وردة "والدي"

3-تالت وردة لصديقتي الغالية "شهرزاد" لأنها بتعشق الورود.

--
*لو أعطيتك ورقة بيها 3 سطور وقلت لك أكتب فيهم اللى أنت عيزه هتكتب إيه ؟؟

كلمات باكتبها لنفسي ولأي حد:
الدنيا قصيرة أوي وهتنتهي هتنتهي , لو كلنا فكرنا في ده حاجات كتير اوي سيئة هتختفي من حياتنا , انك تكره حد , انك تأذي حد , انك تظلم حد كلها حاجات لو فكرنا فيها مش هنعملها. الدنيا قصيرة أوي واللحظة اللي بتمر مش بترجع تاني , عيش اللحظة بكل ما فيها , بحلوها ومرها ولكن ما تتركش الفرصة لمرها انه ينسيك حلاوة اللحظة اللي بتعيشها.

--
*ما هو هدفك فى الحياة ؟؟

هدفي في الحياة اني اعيش حياة بسيطة هادية ما اعملش فيها حاجة اندم عليها سواء وانا عايشة او بعد مماتي , هدفي ان يكون لحياتي معني لية وللناس اللي حوالية وتكون حياة افخر بيها يوم الحساب ولا اخجل منها سواء من الناحية الاجتماعية او العملية او الدينية.

--
*إن شاء الله بكرة هيكون أحسن من النهارده"ِهل تصدق هذه المقولة ؟؟ ولماذا ؟؟

طبعا.. لان "ان بعد العسر يسرا" , والحياة سلسلة يوم حلو ويوم مر , وحتي في أسوأ الأحوال اكيد في يوم الحياة هتنتهي وننتقل للحياة الأبدية في الجنة ان شاء الله فأكيد هتكون أحسن من اللي احنا فيه هنا في الدنيا.

--
*أجمل مقولة سمعتها فى حياتك ؟؟

لو من المقولات المأثورة : بيعجبني اوي قول : "لا يوجد ما هو أبعد من لحظة مرت"

--
*من المغنى اللى بتحبه أوى و إيه أحلى أغنية ليه بتحبها ؟؟

مش بحب مطرب بعينه او أغنية بعينها , اي اغنية كلماتها حلوة وموسيقاها حلوة بأحبها وخاصة اغاني فيروز ومن الجديد عمرودياب وقصائد كاظم الساهر.

--
*"غزة" تمثل لك إيه فى حياتك ؟؟

حلم مش هيتحقق الا لما أشياء كتيرة تتعدل الأول في باقي بلاد العرب.

--
*أعطى لإنتمائك لوطنك درجة من مائة ؟

انتمائي لوطني 100% لارتباطي بالمكان والناس اللي فيه.

--
*لو تزوجت و أنجبت بنتين وولدين أى الأسماء تختار لهم ؟؟

لم احدد بعد

--
*غشيت فى أمتحان و انت صغير ؟؟

ممكن وانا في ابتدائي مرة تقريبا اللي فاكراها ومن بعدها قررت اني مش هاغش تاني, لاني مؤمنة بان مهما تعمل مش هتاخد الا نصيبك

--
*لو أتعرض عليك رشوة كبيرة و انت فى زنقة ماليه هتعمل إيه ؟؟

لن أقبلها.. المبدأ مرفوض تماما , ولو في زنقة مالية فيه طرق تانية احصل بيها علي المال..

--
*قول 3 صفات ب 3 كلمات بس توصف بيهم شخصيتك ؟

مترددة , منطوية , عنيدة

--
*اول مرتب ليك وكان كبير يكفي تجيب اغلى هدايا هاتجيب لكل فرد في عيلتك ايه؟

هأجيب لكل واحد الشيء اللي محتاجله. وان كنت بأفضل الهدايا الغير تقليدية والغير متوقعه بتبقي اجمل.

--
*ايه المجال اللى غير دراستك وشايف نفسك فيه قوي؟

الفنون الجميلة والديكور كانت حلم من أحلامي

--
*بتحب السفر؟

أكيييييييييييييييييد

--
*طب دلوقتى حالا ايه المكان اللى نفسك تكون فيه ؟

لو لهدف يبقي مكة المكرمة

لو للفسحة ألمانيا

___

بامرر التاجين لكل اللي يقرا الموضوع ويترك تعليق :)

__