كسرة ايه وفتحة ليه ! لغتنا الجميلة.. باي باي!

منذ فترة طويلة واثناء سيري في احد الشوارع التي أمر بها يوميا للوصول لمنزلي , لفت نظري وجود لافتة اعلان عن مركز جديد , وظللت كل يوم في اثناء سيري انظر لها واتعجب وادعو الله ان يشعر احد بمعاناتي ويحركها من مكانها لاني احيانا باشعر انها وضعت في هذا المكان المواجه لعيني تحديدا عِنداً في.

والي الان كل يوم في طريقي اري اللافتة واكظم غيظي , لكن خلاص طفح الكيل , وهاحكي لكم علشان نتغاظ كلنا سوا.

..
اللافتة كتب عليها بالبنط اللي مش عريض

مركز ال***** للسمنة
ت/019000000

حيث "*****" هي اسم المركز ,بالطبع بعضكم سيقول وايه المشكلة في الاعلان يا سنو؟؟ انتي دايما كدة بتتجني علي خلق الله؟!

سؤال:

المفروض افهم ايه من اعلان زي دا , انتوا فهمتوا منه ايه, مركز عفريت للسمنة , ياللهول!؟؟؟
الاعلان كله مشكلة..

ازاي؟ّ

!!!

!!

!
أولاً:

مركز ال****

طيب, هل هو مركز تعليمي , ام مركز ديني ام مركز رياضي او مركز شباب مثلا او مركز الكرة الارضية!! يعني باختصار كان من الممكن كتابة "مركز ال!!!! الطبي" علي الاقل يتم تمهيد القاريء ان باقي الاعلان عن شيء طبي ما اتصدمش في النهاية!!

..

ثانيا:

وهنا تكمن المشكلة الرهيبة لأنها مشكلتين في بعض

"للسمنة"1 : طبعا كلنا ندرك معني السمنة وخاصة الجنس اللطيف , لانهم ادري بأمور المطبخ!! , الكلمة كتبت بلا اي تشكيل ولا أي كسرة ولا ضمة ولا فتحة , يعني من الممكن ان تقرأ الاعلان احدي ربات البيوت فتحسب انهم بيوزعوا علب سمنة بلدي افضل من اللي بتشتريها من الجمعية فتتصل علي الفور بالرقم , وتطلب علبتين دليفري بس يكونوا النخلتين مش روابي!!

دا بالنسبة للمشكلة الأولي , فين المشكلة التانية

!!

"للسمنة"2 : علي اعتبار ان اللي قرأت اعلان احدي الفتيات المهتمات بامور التخسيس وعلاج النحافة , اكيد هتفهم انهم ممكن يخلوها سمينة في اقصر فترة لانه مركز للسمنة , يعني اللي عايز يتخن يا جماعة يتصل بيهم لان المركز كله قائم علي السمنة , مركز مخصوص للسمنة , كان من الممكن مثلا كتابة "مركز الاوهام الطبي لعلاج السِمنة" فنفهم ان دا مركز طبي , فيه اطباء علاج طبيعي وتغذية وبيعالجوا السِمنة , كدة الرؤية توضح.

..

ثالثا:

نيجي للمشكلة الثالثة , فين العنوان؟!

يعني علي اعتبار ان اللي قرأ الاعلان ربنا الهمه وفهم ان دا مركز طبي لعلاج السِمنة بكسر السين والتشديد عليها, هيتصل بالتليفون يطلب واحد علاج طبيعي في الفرن ولا ايه!! , ولا العلاج منزلي؟! ولا لازم الاول يتصل وكل ما تتصل اكتر فرصتك في الفوز تكبر! ولا يمكن مثلا يا سنو لازم تتصلي علشان يعرفوا ان حضرتك هتشرفيهم فيدوكي معاد مناسب للاوقات اللي بيشتغلوا فيها علي اعتبار ان الدكاترة هناك مش فاضيين, ولا يمكن لانه مركز للسمنة فهم عايزين يوفروا عليكي المشوار لانهم عارفين ان حضرتك مش هتقدري تتحركي من بيتك علشان تروحي تشوفي المركز بنفسك او يكونوا هيبعتولك ونش..أقصد ليموزين تاخدك من البيت! , ولا يمكن هم خايفين تروحي تتفرجي الاول فتغيري رأيك , ولا يمكن...!

كفاية كدة حد يكمل بدالي..

..

رابعا:

الرقم اللي مكتوب رقم موبايل!!

طيب فرضا جدلا ان انا مش معايا موبايل بلاش اتعالج يمكن دي مش منطقية علشان دلوقتي المحمول في يد الجميع, فرضا اخر اني اتصلت ولقيت الموبايل مغلق منا اكيد هازهق ومش هاتصل تاني, طيب فرضا اني مش عايزة اتصل من موبايلي علشان رقمي ما يظهرش عندهم, ولا لازم اضطر اتصل من موبايل خارجي"دقيقة المحمول ب 75 قرش" , ايه اللي هيحصل لو وفروا علية المجهود دا وكتبوا رقم أرضي , علي الاقل اشعر باطمئنان للمركز بدل احساسي بأنه مكان غير امن نائي مهجور , اذا كان حتي مافيش تليفون أرضي!!

..

خامسا:

المركز الرائع الهائل دا بقيادة المايسترو مين؟؟

يعني مين اللي بيشتغل فيه , مين اللهو الخفي اللي هيشرف علي تخسيسي وحتي باعتبار انهم لفيف من نخبة الاطباء الاغنياء عن التعريف من حقي اني اعرف, حتي ابقي رايحة وكلي فخر واطمئنان اني باتعالج عندهم.

..

سادسا:

عايزة اعرف فيه الرقابة علي الاعلانات دي؟!

يعني ممكن واحد يحط اعلان ويكتب فيه "مركز ابو حشيش للادمان ت-015000000 علي اعتبار انه مركز لعلاج الادمان وهو في الاصل ما هو الا مروج للمخدرات تتصل بيه علي الموبايل يديلك العنوان في امان!!!

..

فيه منكم هيقول يا سنو دول ناس متواضعة ما بيحبوش يتكلموا عن نفسهم وخير الكلام ما قل ودل "بس دا لو فعلا دل علي شيء فانما يدل عن جهل واستغباء الناس وان لغتنا الجميلة بتنحدر نحو القاع.

..

وممكن حد يقول يا سنو الاعلان صغير علشان يوفروا وكدة كدة اللي عايز هيتصل ويعرف التفاصيل . جميل , بس دا لا يمنع ان الاعلان مبهم وبيعتمد علي ذكاء اللي بيقرا ويفهمها وهي طايرة "واضح ان المركز بيعالج الأذكياء فقط"

..

وبعدين هل ممكن انا اعلق اعلان واكتب مثلا "مركز سنو للاطفال" واسيبكوا لشطارتكوا علي اعتبار اننا بنوزع اطفال ببلاش , او انه مركز اطفال انابيب مثلا او ملاهي او حضانة مهي كلها مراكز , وكل دا اساسا وانا لسة في بكالوريوس واكتب رقم موبايلي واللي يتصل بعد ما فهم ان المقصود انه مركز لعلاج الاطفال , اتأكد الاول انه مش دسيس من الضرايب وبعدين اديله عنوان بيتنا علشان الحسد يعني ولا ايه؟!!!

..

انا فكرت اني اخد الرقم وأتصل بيهم مجرد فضول مش اكتر بس الحقيقة موبايلي فقد شحن وجاله تصلب شرايين وارتفاع في ضغط الشبكة!!
..