الثلاثاء، مايو 06، 2008

وطنية , غل أم قلة ذوق؟!

المترو كلاكيت خامس مرة "معلش استحملوني" :)

المكان: عربة السيدات بمترو الأنفاق , وعلي غير العادة كانت غير مزدحمة الي الحد الذي تستطيع معه الوقوف الادمي , أي يفصلك عن من بجوارك بعض السنتيمترات
الزمن: وقت الظهيرة ولكن حرارة الجو معتدلة الي حد ما

الموقف 1:
-
أتيحت لي الفرصة لكي اجلس بعض بضع محطات من الوقوف و فجلست بمكاني , وشيئا فشيئاً بدأت العربة تخلو من الركاب , حتي بقي عدد قليل من النساء الواقفات.الكل يجلس في هدوء , وصمت يخيم علي العربة , قطعته أصوات نسائية , حيث دخل عدد كبير من السائحات الأجنبيات بصحبة مرشدة سياحية مصرية محجبة.

ومهما حاولت وصف الموقف وردود الأفعال لن تتخيلوا ماحدث , ولكني أعتقد ان باستطاعتكم التبؤ بذلك. كانت السائحات في الغالب اميريكيات استطعت تبين ذلك من الأحاديث التي دارت بينهم , ولم اكن أحاول التجسس أو التصنت وانما شاء حظي أن يقفوا في الفراغ امامي وكانت لهجتهم مختلفة سرقت أذناي بعيدا عن الصمت الذي كان يغطي العربة قبل ركوبهم.
كانت المجموعة مكونة من حوالي 10 سيدات في أعمار مختلفة , فاحداهن اجزم بانها تخطت الستين وكانت بشوشة جدا فعن غير قصد منها لمست قدماها قدم امرأة تجلس فاخذت تعتذر لها بابتسامة لطيفة وتكرر اعتذارها, والبعض منهن بالعشرينات والباقيات في المرحلة الواقعة بين ذلك , يرتدين ثياب صيفية "خفيفة" أو لنقل خفيفة جداً , وبالطبع لم يسلموا من كم التعليقات التي لم توجه اليهم وانما كانت تُهمهم بها كل امرأة بالمترو
فعلي سبيل المثال وليس الحصر:-
ارفعي البلوزة شوية
-هتروحوا من ربنا فين
-عساسيل "كان هذا تعليق احدي فتيات المرحلة الثانوية"
-جايين يقرفونا في بلدنا-
فاكرين نفسهم قاعدين علي البلاج
-شوفي البت بطنها باينة و.. باينة وفرحانة بنفسها ازاي

وهكذا جلست حوالي ربع الساعة اسمع التعليقات السابقة وغيرها , ولكم أن تتخيلوا المشهد وكل الأعين بالمترو معلقة بهن أو محملقة بهن.
اما انا فقد جلست اتأمل الأوجه , أنا أعشق تأمل اوجه البشر , كانت أوجههن تحمل كثيراً من السعادة والنشاط والمرح استطعت الاحساس بالفارق عندما انتقلت الي اوجه السيدات المصريات اللاتي لم اجد علي أوجههن الا الحزن والهم والتعب والشقاء و... قررت عدم النظر الي اي وجه.
*****

الموقف2:
-
صعدت احدي البائعات الجائلات ببضاعتها المكونة من لبان وبنبون تقوم بتوزيعه علي أرجل الركاب ثم تعود لتجميعه مرة اخري.
في هذا الوقت كانت المرأة الاجنبية الستينية قد أتيح لها الجلوس فقد كانت العربة شبه خالية الا من بعض الواقفين , فجلست علي احد الكراسي حتي جاءت البائعة ووضعت علي رجلها عبوة لبان وقد فعلت ذلك مع كل ركاب المترو.
فما كان من المراة الا أن اخذت عبوة اللبان ووضعتها بحقيبة يدها في صمت وجلست أنا أضحك مما يحدث امامي فقط اتامل الموقف في شغف.
قامت الفتاة التي تجلس بجوار المرأة بتنبيهها الي ان عبوة اللبان الواحدة ثمنها 50 قرشاً فتفاجئت المراة ثم ابتسمت وشكرت الفتاة واخرجت من حقيبتها مبلغ 1 جنيه وأعطته للبائعة عندما رجعت , ثم دار بينها وبين زميلاتها حديث عما حدث , وقد ازعجني جدا أن سألتها احداهن
"هل انتي متاكدة من أنها تباع ب 50 قرشاً؟!"
فقد كانت تشك ان من الممكن أن تكون تعرضت لعملية نصب او ما شابه في 50 قرشاً!!!!
أدركت وقتها ان ما يقال عن المصريين في الخارج قد وصل وبنجاح الي الولايات المتحدة أو الي أياً كانت بلدهن القادمات منها و شعرت وقتها باهانة ابتلعتها في صمت.
*****

الموقف3:
-
كل ذلك كان يحدث وباقيهن واقفات يتحدثن بصوت مسموع أنعش المترو بعد فترات الصمت التي مررنا بها فقد كان حديثهن عن المعالم السياحية والمزارات والفروق بين هنا وبين بلادهن ولكنه كان حديث مرح شيق منعش. حتي نزلت الفتاة التي كانت تجلس بجواري وخلا مقعدها , ولم تكن هناك واقفات الا السائحات , وكن قد وقفن لفترة طويلة معطين اياي ظهرهن وتفصلنا مسافة قصيرة , فسألت احدي الفتيات القريبات مني ان تنبههم ان هناك مقعد خالي اذا رغبت احداهن في الجلوس
"-لو سمحتي ممكن تشاوريلهم ان فيه كرسي فاضي"
قابلتني بنظرة بلاهة غير معهودة ولم يسبق لي ان رأيتها في حياتي , فبادلتها نظرتها بنظرة رجاء مني , ولكنها رفضت تغيير نظرتها تلك وظلت ناظرة الي في صمت غريب طال الي ان قطعه صعود احدي السيدات وجلوسها علي الكرسي , وهنا فقط فتحت فاها وقررت الرد علي كلامي قائلة:
-احنا أولي بكراسينا منهم
وكان كلامها يحمل الكثير من الحقد والغل وعذراً "قلة الذوق"ثم اتبعت كلامها بنظرة احتقار , وقامت من مكانها لتنزل المحطة القادمة , وتركتني احاول تقبل نظرة احتقارها لي في هدوء وابتلعها هي الاخري في صمت..

وجلست ما بقي من طريق افكر , هل حقا "احنا اولي بكراسينا منهم" , أم ان كرم الضيافة يحتم علينا معاملتهم بلطف؟؟ أم أن الانسانية تدعونا الي الرفق بالبشر أياً ما كانوا علي اختلاف دياناتهم ومعتقداتهم؟؟ وهل نأخذ الشعوب بما يفعل قائديها؟؟ وهل نرد الاساءة بالاساءة؟؟
لقد جلست في حيرة من أمري طوال الطريق حتي عدت الي منزلي وجلست الان اكتب لكم ما حدث علي أمل أن اسمع أرائكم في كل من المواقف الثلاث فقد كان من الممكن ان يكون ايا منكم معنا بالعربة..

هناك 37 تعليقًا:

Hosam Yahia حسام يحيى يقول...

مدونه جميله

ربنا يجعلها فى ميزان حسناتكم


انا اظن انها غل وقله ذوق


تحياتى

shirry يقول...

علي فكرة الموضوع بجد رائع
وانا من رأيي
ان كرم الضيافة يحتم علينا معاملتهم بلطف
وعلي فكرة الستات دي عملت كدة علشان هما مش تمام يمكن مش عارفين كرم الضيافو يمكن غل علشان هما حلويين ومحافضين علي نفسهم
ويمكن ثقافة

تحياتي

dr_modymodak يقول...

بالنسبه للموقف الاول
********************
ما تنسيش يا سنو اننا شعب شرقي مسلم متعودناش علي الاشكال دي فمن الطبيعي انك تلاقي استغراب بس عاوز اقول حاجه اللي بيته من ازاز ما يحدفش الناس بالطوب

طالما بتسمحي لبنتك تنزل بالجينز وبالضيق فمتستغربيش


بالنسبه بقي للموقف التاني
**************************
وانا كمان حسيت بنفس الاهانه دي..بس للاسف شعبنا غلبان بينام من غير عشا
واللي ايده في الميه مش زي اللي ايده في النار


الموقف التالت
*************
انا وابن عمي علي الغريب بالطبع غلط تماما الفكر ده

انا برده من نفس رايك علينا كرم الضيافه والمعامله الشيك لان المواقف دي فعلا بالرغم من انها صغيره بس بتبان في عيون الناس دي كبيره اوي

تحياتي يا سنو

المـــفـــــــقــــــــوعـــــة مــرارتـهــا يقول...

لفت نظري موضوعك بما اني خريجة إرشاد سياحي .. جايز أخدتها من قصيرها وقعدت في بيتي معززة مكرمة
بس باحب السياح ... الصراحة فيه منهم ناس في منتهي الزوق تحسي كدة انهم ولاد ناس
بصي بقي بالنسبة لتساؤلاتك الكلام عن هدومهم ... يعني هو احنا اللي الهدوم بتاعة شابات اليومين دول اللي محترمة اوي
طبعا مش باعمم بس فيه بنات عندنا بتلبس ذيهم ...

بأضايق قوي من منظر شحاتين مصر ربنا يجازي اللي كترهم


الموقف التالت بقي ... فكرم الضيافة راح فين الناس مش عارفة جرالها ايه بجد الشعب المصري اتغير وأتبدل

موناليزا يقول...

تعليق على المواقف الثلاث هو"كنتم خير امة اخرجت للناس تأمرون بالمعروف وتنهون عن المنكر

رندا يقول...

مهما علقنا ياسنو هل تفتكرى هنغير شئ
مع الاسف الناس اصبحت غريبة فى زمن اغرب
برافوا عليكى البوست حلو قوى
بس مش هنغير اى شئ وحتى لو تكلمنا عن حلول
احنا بننفخ فى قربة مخرومة مع الاسف
ارحمنا يارب

تحياتى لجمال البوست ولجمال الصورة

رندا

فاتيما يقول...

و الله يا أميرة الحواديت
خاطبوا الناس على قدر عقولهم
و الاجانب دول عقلية مختلفة و تقاليد مختلفة و مزاج مختلف ...
و الله لو أتنين باسوا بعض قصادى موش هتكلم و لا أعترض حتى جوايا لأنها تقاليدهم و عاداتهم و ساعات كتير بحس الأجانب بيحاولوا احترام شرقيتنا و اخلاقيتنا و لو حتى من باب الاحتياط الأمنى و عدم أستفزاز البشر ...
طبعا رأيى أنها قلة ذوق بسبب التربية و قفلة المخ
و غل لأن الظروف المادية ضاغطة على الأعصاب
و عدم وطنية لأن دول ضيوف عندنا و حرصاً على سمعة بلدنا لازم نتعاملهم كويس لحد كبير بس طالما لا يصل لدرجة تمس الكرامة و الفضيلة و اظن أغلب الأجانب لا ينخطون هذا الخط الأحمر خصوصا فى الأماكن العامة
و تحياتى يا عزيزتى

سنووايت يقول...

حسام يحيي
اهلا بك بالمدونة وشكرا لك
اللهم امين
وشكرا علي رايك



shirry
شكرا يا شيري علي رأيك
بس غل علشان حلوين دي غريبة شوية :)
اهلا باول تعليق في المدنة



د/مودي
احنا طبعا شعب شرقي ما قلتش حاجة وعلي فكرة الاجانب لما بيجوا هنا بيحاولوا يحترموا نفسهم علي قد ما يقدروا علي الاقل في الاماكن العامة وهم فعلا كان لبسهم مش فاضح اوي يعني هي المشكلة بس ان شكلهم في وسطنا غريب ودا طبيعي لانهم اجانب اساسا

صح انا كمان حسيت اوي بمعني كلمة شعب غلبان لما شفت الموقف دا

الحمدلله ان رأيك كدة في الموقف التالت انا استغربت جدا من موقفها وحبيت اشوف الاراء
تحياتي لك

سنووايت يقول...

مفقوعة مرارتي من حماتي:
ايه دا خريجة ارشاد سياحي كمان :)
هو انا لا بحبهم ولا باكرهم , هم ناس وخلق من خلق الله
الشحاذين بقوا علامة من علامة بلدنا والحمدلله
عجبتني اوي كلمتك الشعب اتغير واتبدل
ايه بقي اللي بدله وايه اللي غيره؟؟

سنووايت يقول...

monaliza
********
تعليق على المواقف الثلاث هو"كنتم خير امة اخرجت للناس تأمرون بالمعروف وتنهون عن المنكر

الله عليكي
علي فكرة انا بقي لما كنت باتفرج علي اللي بيحصل جت في بالي اية تانية


"ولا تمدن عينيك الى ما متعنا به ازواجا منهم زهرة الحياة الدنيا لنفتنهم فيه ورزق ربك خير وابقى"

سورة طه - آية
131

رغم اني ما كنتش عايزة الموضوع يتحول لنقاش ديني بس انا هاوضح لك وجهة نظري

انا مش بدافع عنهم يا موناليزا او بقول انهم احسن مننا , الحمدلله اننا خير امة اخرجت للناس بنأمر بالمعروف وننهي عن المنكر , ولكن بأي اسلوب وبأي طريقة هي دي المشكلة
لما ناس مفييش بيني وبينهم اي حاجة بيتعاملوا معايا بذوق وهم ضيوف عندنا تعاليم الاسلام بتقولنا اننا نتعامل معاهم بالحسني , الرسول عليه الصلاة والسلام كان قدوة لينا في دا
لكن لما ييجوا ويلاقونا بنتعامل معاهم بالاسلوب دا هيرجعوا بفكرة واحدة عن المسلمين والعرب وهي انهم قللات الذوق والاحترام وكما يقال عنا همج
من ناحية اننا ننهي عن المنكر فدا سهل اوي اننا نفهمهم اننا شعب ليه معتقداته وعاداته اللي ما ينفعش تعديها ولكن باسلوب هم يفهموه ومش باسلوب معاداة وهجوم مش فاهمين هم سببه ايه

يا رب أكون قدرت أوصلك قصدي

سنووايت يقول...

رندا
****

يمكن نقدر نغير حاجة
علي فكرة لو احنا عايزين دا هنقدر نغيره , التغيير مني انا وانتي وكل واحد بيفكر وبيشغل عقله , لكن طول ما احنا سايبين الدنيا تبوظ ونقوول هنعمل ايهمفيش حاجة هتتغير
مش كدة ولا ايه
ايه رأيك نعمل حاجة , فكري معايا كدة :)
تحياتي ليكي وشكرا علي رأيك وردك



فاتيما
******

"خاطبوا الناس على قدر عقولهم
و الاجانب دول عقلية مختلفة و تقاليد مختلفة و مزاج مختلف ..."

بجد انتي قلتي الخلاصة
ازاي نلاقي الطريقة اللي نخاطبهم بيها
احييكي علي رأيك وتعليقك , عجبني رأيك جدا

دعاء مواجهات يقول...

الواحد بصراحة بيتكسف لما بيلاقى مصريين محدثين بالشكل دة وبيتكلموا كدة
قال يعنى الاجانب فاهمينهم

بس تقوللى اية بقى
يابنتى انتى فى مصر اذن لاتعجبى وتريثى


هههههههههههههههه

حابة اوى نقدك للواقع واسلوبك متميز

انتظر مرورك بمدونتى

الفارس الملثم يقول...

بدايه بالنسبة للموقف الاول فهي عاده سخيفه بصرف النظر عن كونهم سياح ام لا , ممكن نقول عليه فن النميمه المعتاد عندنا ,وان لم يكن علي اللبس ايكون عن اي شئ اخر..

اما بالنسبه للمواقف الاخري انا حقيقي مش لقيله مبرر بس هي ناس ناقمه علي الحياه نفسها فبطلع نقمتها علي الاخرين ..

بس حقيقي بوست قيم اوي لما يحمله من رصد لتصرفات سلبيه وغير مبرره..

تحياتي
محمد

Unknown يقول...

بصراحه الاسلوب نفسه بتاع الستات مش كويس
لكن خلينا نحط نفسنا مكانهم
دول امريكااااااااان ياجماعه

كان اولي انتي تكرهيهم ونسيبنا بقي من نغمة بلدك التاني مصر والكلام ده لاننا بصراحه مبنرحبش بيهم في اي وقت
ولا كرم ضيافه ولا غيره
دول بيقتلونا بفلوسنا حسبي الله ونعم الوكيل

سوري ياسنو وايت
ان اول تعليق يكون لهجته حاده كده

بس انا بكرههم جدا

تمنياتي بالتوفيق

اتمني تنوريني

أحمد سعيد بسيوني يقول...

بسم الله
اول زيارة للمدونة
والحقيقة فهي مدونة جميلة ومتميزة
الموقف الاول طبيعي جدا
يعني لو واحدة مسلمة راحت هناك برضه هيستغربوا من لبسها المحتشم ونحن هنا نستعجب من تبرجهم
وبالنسبة للموقف الثالث فاوافقك الراي فيه
فهم في بلدنا ووجب علينا كرم الضيافة وان كنا منهم مستايين
تحياتي

Rania Lelah يقول...

كما قلتى عززيتى فى عنوان موضوعك
انه حقد و غل
فان كانوا على قدر من الوطنيه
فكانوا فعلوا مثلما فعلتى
كانوا حافظوا على واجه مصرنا امام الغرباء
فليس عيب عليهم ابدا
ان يسئوا فهمنا و فهم شعبنا
فنحن حقا بهذه الافعال نستحق هذااااا
فبدلا من ان يقوموا بالسخرية من ملابسهم
فهل يفعلون مثلهم حتى فى بيوتهم
ام يقدرون هذا عيبا و غير مباح
هل عندهم قدر من الثقافة و لوحتى بسيط
ان يعرفوا ان لكل بلد ثقافته و كل واحد حر فى منظره مادام محافظا بزوق على عادتنا نحن
فوجه مصر امام الكثير من الغرباء
انها بلد النصب
حيث يقوم الشاب عبر الانترنت بالتلاعب بالفتيات حتى يتزوجن ببهم
اتعلمى
كنت مرة عبر الشات احدث اجنبيه
و عندما قلت لها اننى من مصر الغاليه
قالت " نصابين "
؟؟؟؟؟؟؟؟؟


تحياتى

wanna b a physician يقول...

الموقف الاول ده تدخل ملوش لزمة فى خصوصياتهم هما حرين احنا مالنا ولا هنعمل اللى بنقول انهم بيعملوا من كبت لحرية الرأى
الموقف الثانى
ماهو ياسنوو احنا اللى عملنا فى نفسنا كدا وعرفنا العالم اننا نصابين وكلام من ده اذا كانوا الصينين اتعلموا الفصال مننا بلا قرف بقا
الموقف الثالث
طبعا قلة ذوق وحقد لان طبعا مش المفروض نبدء باساءة لحد وطول ما احنا كدا هيفضلوا هما كدا لكن العكس صحيح هى لو نادتها هتبقى لمحه كويسه منها
تحياتى ليكى

Mero.. يقول...

بجد الموضوع جمييل جميل جميل

هبدا باخر موقف لانه بجد يفقع المرارة بس اسمحيلي اقولك انتي الغلطانة..
كان المفروض نزلتي ورا الاخت اللي بتقول احنا اولى بكراسينا ورميتيها تحت المترو وريحتي البشرية المعذبة من احد اسباب عذابها..
اشمعنى احنا لما بنبقى عندهم محدش منهم بيقول احنا اولى ولا بيتف في الشاي ولا بينيم كاوتش العربية
فعلا في ناس راقية وناس ......

المهم برضه كعادة الشعب المصري ميسبش حد في حاله لازم تعليق مهما كان على اي حاجة اللبس ..اللون..اي حاااجة..
اخيرا بقى ع السمعة فاحنا نستاهل انيل من كدا..
تخيلي واحدة "نيجيرية" داخلة الصيدلية بتقول للراج عايزة انتي بيوتيك عشان لما امسك الفلوس المصري ميحصليش انفيكشن...


تحياتيييي على البوست المبدع

سنووايت يقول...

دعاء مواجهات
اهلا بيكي وبرايك يا دعاء
بس اذا كان اللي عملوا كدة مصريين ففي بردو مصريين زيي وزيك وزي الناس اللي قالت رأيها هنا, يا رب كترهم


الفارس الملثم
هي فعلا تصرفات غير مبررة لاني مش لاقية لها اي مبرر الي الان
شكرا لمشاركتنا رأيك



ba2rsh
اهلا برأيك حتي وان كان فيه نغمة حادة انا طرحت الموضوع علشان اعرف كل الاراء ونناقشها مع بعض من غير اي تعصب

انا معاك انهم امريكان واننا من داخلنا مش بنحبهم , ولكن "لكم دينكم ولي دين" الناس دي يمكن ما يعرفوش اي حاجة عن اللي بيحصل و علي فكرة في عز اللي كان بيحصل في العراق كان فيه تعتيم جامد جدا , مش كلهم هناك يعرفوا وحتي اللي يعرفوا مش كلهم فاهمين
يبقي ابسط حاجة لما الناس دول ييجوا عندنا يزورونا ننوريهم احنا يعني ايه مسلمين ويعني ايه مصريين , ونعرفهم طبيعتنا المتسامحة والمودة والرحمة اللي بنتعامل بيها حتي مع الغرباء
ولا ايه رأيك؟؟



أحمد سعيد البسيوني
اهلا برأيك واهلا بك علي المدونة
فعلا معك حق في الموقف الاول هما هيستغربوا لكن هم بطبعتهم ما عندهمش جانب التدخل في حياة الاخرين زي ما عندنا
والموقف التالت احترم رأيك فيه طبعا
وشكرا لمشاركتك




رانيا
علي فكرة حصل نفس الموقف معايا قبل كدة وكنت بأكلم شخصية سورية ومش أجنبية وقالت لي أول مرة اعرف ان مصر فيها ناس محترمين لاني اعرف ان كلهم حرامية!!!!!!!

سنووايت يقول...

wanna b a physician
واضح انك متذايق اوي من الصينيين "هوموو عروسة" :)
باحترم رأيك طبعا لانه دا اللي كنت عايزة اقوله
شكرا علي مشاركتنا رأيك



mero
****
اصل الجو كان حر وانا ما صدقت لقيت المترو فاضي علشان كدة ما نزلتش وراها:)
لا بجد انا فعلا قعدت متنحة كدة دقيقتين تلاتة باحاول استوعب الموقف والتصرف الغريب اللي صدر منها مش عارفة امتي الناس هتبدأ تفكر بعقلها وتحكم عقلها , بجد نفسي اعرف امتي
بس موضوع الانتيبيوتك دا جديد جدا
انتيبيوتك مرة واحدة , بس عندها حق , انا كنت حتي عملت موضوع قبل كدة عن النقود الورقية عندنا في مصر
شكرا لرأيك يا ميرو

Unknown يقول...

سنو وايت
رغم اني صعب اقتنع الا ان كلامك نسبيا اقنعني

لكن مازلت عند رأيي في جزئية اني اكرههم من كل قلبي

يارب انام واصحي ملاقيش امريكان ولا يهوود


قولي امين يا سنو وايت
قولي
مبتقوليش ليه
ماتقولي


اااااااااااااااااامين


سلام

شهرزاد يقول...

كل ده في المترو :)
انا عرفت هنكتب ايه انا وانتي مغامراتنا في المترو
البوست ده داس على وتر حساس
ثقافة الغراء والالتصاق من مدونة بلدك يا رأفت
الناس مابقاش عندها شغلانه غير بعض
الموقف الأول: تدخل سافر في حرية الآخرين وهو امعتاد في مجتمعنا المتخلف
بس ياترى لو كانت الأجنبيات دول عربيات يعني بيفهوا لغتهم كانت هتبقى عندهم الجرأة انهم ينتقدوا بصوت عالي ولا عشان هم مش فاهمين واخدين راحتهم ده نوع من الجبن في رأيي
الموقف الثاني: محزن للغاية صحيح اننا احنا اللي ادينا انطباع عالمي سئ عننا
بس أنا أعتقد ان مصر معروفة بكرم أهلها فأنا مش معاهم في تشكيك الزمة ،أعتقد انها طبيعة في الشخصية دي انها تشكك في اللي قصادها
الموقف الثالث: سيبوني ماحدش يمسكني
بجد مستفزة للغاية، لا من الدين ولا الأخلاق اننا نعامل الناس بمثل معاملتهم ونرد الاساءة بالاساءة"عامل الناس كما تحب أن يعاملوك" لو كل تصرف سئ ردينا عليه بخشونة يبقى هندي انطباع سئ عندها وساعتها لانلوم غير أنفسنا وكمان زي ماقلتي ياسنوي غلطة رئيسهم وحكومتهم ليه بنحملهم ذنبها

والمشكلة ان المواقف التلاتة سلوكيات شعوب
ماعتقدش انها وطنية اطلاقا
غل ممكن ، قلة ذوق أكيد
لكن أولا وأخيرا سلوكيات شعب عايز يتربى من أول وجديد
حل المشكلة دي يا سنووي انك تبطلي تركبي المترو :))

غراب يقول...

السلام عليكم و رحمة الله و بركاته
...............................

طبيعي جداً التعليقات اللي انتي سمعتيها
دة أقل واجب D:
لا بجد و الله طبيعي تخيلي كدة واحدة طلعان عينها و عين..... شغل و عيال و بيت و مسئوليات و بهدلة و......
و بعدين تشوف ناس بالمنظر دة سايبين بلدهم اللي ف آخر الدنيا و جايين يتفسحوا ف مصر اللي همة مش طايقينها و لا طايقين العيشة فيها أساساً
و هية يا حبة عيني نفسها تروح تتمشي ع النيل مش تسافر و تعدي بحور
غير انهم يا عيني تلاقيهم بيتحسروا علي شبابهم اللي ضاع ع البهدلة و البيت و العيال دة طبعا غير ان التريقة و تلئيح الكلام بيجروا ف دم كل مصري و مصرية
أما بالنسبة لحكاية المقاعد و مين يقعد و مين يقف أعتقد أن أنا لو مكانهم و لقيت حجد منهم واقف انا ممكن اقوم له
يمكن اسيب عنده انطباع عن الشعب المصري
و عن المسلمين بصفة عامة فممكن دي تكون مجرد رسالة بشكل غير مناسب ليهم
أما حكاية اللبان دي بقي
همة بالرغم من انهم ممكن يكونوا مرتاحين ماديا بس ناصحين جدا جدا لانهم ماشيين بمبدأ أصرف فلوسي بمزاجي بس مش يتنصب عليا و أظن أن دة من حق أي بني آدم ف الدنيا و طبعا من اللي بيشوفوه من الشعب المصري اللي بيتعامل معاهم و بيديلهم الحاجة اللي بعشرة بألف
بجد المترو دة عالم كبير جدا
و لو الواحد بيركب المترو كل يوم و فكر انه يكتب كل يوم حكاية عن المترو الحكايات مش هتخلص

تقبلي مروري :)

alshared يقول...

أسعدني ما قرأت
ليس سلوك المصريين بل الاسلوب الرائع في نقل ما حدث

عموما هي ثقافة مجتمع بشكل عام عدم احترام الاخر بأي شكل من الاشكال

عدم قبول الاختلاف في أي شئ حتي ولو كان في الملبس الذي هو أبسط الحقوق

هناك عادات تحكم هذه الامور ولكن لكل مجتمع عاداته وتقاليده الخاصه به

مدونه رائعه

خالص تحياتي

حمامة يقول...

بشوف كتير حاجات زى كده مش بالظبط بس شبهها يعنى
يعنى بالنسبة لموضوع اللبس وكده انا عن نفسى مش بدقق او بحاول ادي الموضوع اكبر من حجمه يعنى يادوب القى نظره على وشوشهم وخلاص

بالنسبة لموضوع السعر فده شىء محزن جدا بجد :(
لانه بيحصل كتير ف شوارع وسط البلد والبازرات وبقى مكشوف اوى وخلاص بقوا فاهمين بجد حاجة سورى يعنى تعر :(


موضوع الكراسى ده اعتقد ان انتى عندك حق مهما كانوا هما مين ولا منين
المفروض ان فى حاجة اسمها كرم الضيافه
وكما نبينا عليه الصلاة والسلام قالنا نقابل السيئة بالحسن ما بالك هما كأشخاص مش عملولنا حاجة

ربنا يهدى المصريين

Unknown يقول...

سنو وايت
اخبارك
بس كنت عايز امسي واسيبلك تعليق تاني افكرك اني فاكرك

سلاموز

(احمد سكر ) يقول...

بيتهيأ لى

الحاله دى شاذه

بتاعة الموقف التالت

لان عندنا كرم الضيافه بيغلب علينا


اما الموقف الاول

انا مع مفقوعه مرارتى من حماتى

عندنا فعلا بنات بتلبس زيهم امممممم

واكتر كمان

اما موقف البائعه

فلا تعليق عليه


تحياتى

اخيكى احمد سكر

Unknown يقول...

دايماً بنشوف الحاجات دي كتير
متخديش في بالك
تحياتي...فعلاً مدونة جميلة

Unknown يقول...

لا غل وقلة ذوق

غل وحقد من شكلهم ونضافتهم وانطلاقهم

وقلة ذوق نتيجه من اللاوعي الحاقد

وربك يسترها على عبيده

ألا قولتيلي البلوزه كانت عامله ازاي؟؟

:)))))))

WhItE HeArT يقول...

قال تعالى"لا ينهاكم الله عن الذين لم يقاتلوكم في الدين ولم يخرجوكم من دياركم أن تبروهم وتقسطوا إليهم"

وواضح اوي كلمة البر في الاية يعني الاحسان

واعتقد ان دول لا قاتلونا ولا اخرجونا من ديارنا

اعتقد ان اللي حصل ده نتيجة لظروف المعيشه هنا ومقارنتها بالمعيشه هناك اللي اكثرنا بيعتبرها جنة مع انها مش كده


لكن فعلا حياتنا بقت صعبه

اعذريها مع اني عارف ان محدش فينا بأه مستحمل نظرة احتقار عاملين زي عود الكبرين اللي مستني بس تكه صغيره علشان يولع


تحياتي لهدوءك وتصرفك الجميل

منى يقول...

حاسه ان موقفى كان هيبقى زيك بالضبط باستثناء لما الست منبهتش احد السائحات ان الكرسى فاضى يمكن كنت قمت ونبهتها بنفسى من باب الرحمه لان دول واقفين والكرسى فاضى
وكمان دول فى بلدنا
اعتقد ان رد فعل الستات ده عشان كرههم لامريكا فبيكروا كل اللى يجيى منها ويمكن كل الاجانب
تحياتى

صوت من مصر يقول...

يارب اقول ايه ليكى حق بس عشان اعرفك حاجه الاجنبى بكل الجنسيات لو اشترى ابره الى هى الخمسه بشلن هيسال هو اتنصب عليه ولا لا
لاننا من الاخر معروفين باننا نصابين فى الخارج
لسانا سابق كلامنا

يوميات فنانه مفروسه جداا يقول...

سنو ما شاء الله موضوعك حلو اوي وبما اني بركب المترو فبشوف الموقف ده كتير وقولتيه زي ما بيحصل بالظبط .
بالنسبه للبس يا سنو الناس عندهم حق والعيب علي القوانين اللي بتسمح بالبس ده فالعيب علينا احنا بلد اسلامي والمفروض اللي يشرفنا يلتزم بتعالمنا بس هنقول ايه حسبي الله.

الموقف بتاع اللبان احمدي ربنا ان مدخلش كمان بتاع الدبابيس ومفرش المطبخ الدهبي والفضي وكتير وعلي فكره انا مراط خالي ايطاليه ونزلت مره معاها عشان عندها احذيه عايزه تصلحها
تخيلي يا سنو الموقف الراجل اقوله الحساب كام يقولي 12جنيه اقوله ليه
يقولي ثانيه كده ويحسب وابصله ووصل الحساب ل9جنيه ليه شافها اجنبيه والست عايزه تفهم كل حاجه فقال الله صيده سهله بقي نتسلي عليها دانا لولا معاها كان زمانهم كالوها فا دالعادي بتاع المصرين يا سنوو

الموقف التالت البنت اللي بصتلك ديه غريبه جدا وقليلة الدين والذوق ولو جينا للحق قبل الدين هنقول انهم دافعين تمن تذكره عشان يقعدو ولو جينا للدين هنقول ادعو الي سبيل ربك للحكمه ده فرصه يشوفوا معاملة المسلمين الطيبه اقعدهم وارحب بيهم كمان عشان الاشاعات اللي علينا بره نكذبها ونريهم اننا عندنا دين وذوق وانهم ضيوف.

مواضيعك كالعاده هادفه وجميله ربنا يوفققك يا رب يا سنو .
تحياتي

HERO يقول...

طيب مهو ده حال المصريين في كل مكان مش حاجة غريبة يعني وبعدين احنا مش بلد سياحي ولا حاجة والاجانب مغلطوش لما حذروا بعض من سواقين التاكسي في مصر ومن شرب المياه المصرية بل وشجعهوم على الفصال تخيلي كده واحدة اجنبية بتفاصل
فعلا شعب فرعوني

دي اول زيارة ليا
ومدونة رائعة

mohamed يقول...

عزيزتى سنو وايت
لاحظى معى هذة التعليقات التى ذكرتيها
( ارفعي البلوزة شوية-هتروحوا من ربنا فين-عساسيل "كان هذا تعليق احدي فتيات المرحلة الثانوية"-جايين يقرفونا في بلدنا-فاكرين نفسهم قاعدين علي البلاج-شوفي البت بطنها باينة و.. باينة وفرحانة بنفسها ازاي)
(أدركت وقتها ان ما يقال عن المصريين في الخارج قد وصل وبنجاح الي الولايات المتحدة أو الي أياً كانت بلدهن القادمات منها و شعرت وقتها باهانة ابتلعتها في صمت. )
(احنا أولي بكراسينا منهم وكان كلامها يحمل الكثير من الحقد والغل وعذراً "قلة الذوق"ثم اتبعت كلامها بنظرة احتقار )
ماذأقرأ من هذا كلة؟
1-فى الاربيعنيات من القرن الماضى كان يسكن بجوار المصريين أجانب من كل الجنسيات والثقافات والتقاليد
وكانت السيدة المصرية تستطيع أستيعاب الاختلاف والتعامل معة
2-محاولة التعالى على الغير وأظهار النفس بالمثالية على غير الحقيقة
والتمسك بالظاهر والمظاهر
مع وجود سلوك يحمل الكثير من التباين بين ظاهرة وباطنة
3-التدخل والتطفل والحشرية فى أمور الغير عكس ماأمرنا بة ديننا سواء كنا مسلمين أومسيحين
4-الحقد والغيرة
سيدتى نحن نحتاج الى علاج نفسى!!!!

funckydoctor يقول...

بيحصل أكتر من كده
على الأقل الكلمة مابتعورش
أما هما واخدين عنا فكرة ولا أزفت
كنت مرة بقول لواحدة تشيكية على ميعاد الحفل الختامى لأحد الملتقيات فبقولها الساعة 4 ونصف قالتى الساعة 5
انا عارفة الإجيبشين تايم :(

سنووايت يقول...

bar2ash
الحمدلله انك اقتنعت نسبيا دي علامة مبشرة بالخير
ااما عن انك بتكرههم فدي انا مش هاقدر اتدخل فيها




شهرزاد
حلو موضوع شعب عايز يتربي من اول وجديد دي :)
بس اني ما اركبش المترو تاني والله ياريت بس حاسة اني فعلا هافتقده


غراب
وعليكم السلام ورحمة الله وبركاته
معاك حق في كل كلمة قلتها
وعجبني اوي موضوع ان واحدة طلعان عينها بس هم مالهم بكل دا. الظاهر ان الموضوع جزء كبير منه غل


alshared
اشكرك علي رأيك واهلا بك بالمدونة في اي وقت واكيد اللي اسعدك مش سلوك المصريين
وهي فعلا ثقافة مجتمع





حمامة
ايوة علا في البازات الموضوع بقي بيبقي نصب علي اصوله و بس هم الاجانب خلاص عرفوا الاساليب دي
ربنا يهديهم بجد



احمد سكر
انا اللي لفت نظري فعلا اني اعرف ان عندنا كرم الضيافة فاستغربت جدااااا
اهلا بك في المدونة
وشكرا علي مشاركتنا رأيك




dew
اهلا بك
بس لامتي مش هناخد في بالنا
اعتقد دا اللي وصلنا للي احنا وصلناله دلوقتي
شكرا علي مشاركتك



أنونيمس
غل وقلة ذوق
انا قلت كدة برده
البلوزة والله كانت عادية مش مستفزة أوي يعني بس اكيد يعني ما كانتش محجبة :)




white heart
تحياتي لرايك رغم اني مش مفتنعة ان ظروف المعيشة تخلينا نبقي كدة
شكرا لرأيك



مني
بجد يأحييكي علي تصرفك اللي كنتي هتعمليه , يمكن لو ما كنتش اتصدمت كنت عملت كدة بس الصدمة خلتني مش قادرة افكر فعلا
تحياتي لذوقك



صوت من مصر
للاسف اننا معروفين بكدة للاسف الشديد اوي اوي اوي بجد



فنانة مفروسة جدا
معاكي في اننا بلد اسلامي وعلي فكرة هما هنا بيحترموا نفسهم لانهم عارفين ان شكلهم هيبقي غريب يعني هم كدة وهم مراعيين موضوع اللبس
اما الدبابيس بقي والحاجات التانية فده موضوع مستفززززز بجد وممكن نبقي نكتب عليه موضوع المرة الجاية لوحده
احييكي علي روحك المتسامحة وذوقك




hero
اهلا باول زيارة
مصر بلد سياحي علشان الاثار اللي فيها لكن باللي بيحصل ده اعتقد ان الاثار هي اللي هتسافر برة بعد كدة
ربنا يستر



Mohamed
1-فى الاربيعنيات من القرن الماضى كان يسكن بجوار المصريين أجانب من كل الجنسيات والثقافات والتقاليد
وكانت السيدة المصرية تستطيع أستيعاب الاختلاف والتعامل معة

فعلا اختصرت كل الكلام في نقاط محددة, والنقطة دي بالذات من اكتر الحاجات اللي اثارت دهشتي , ايه اللي جرالنا عمرنا ما كنا كدة؟؟



funkydoctor
لأا موضوع المواعيد دا شيء تاني ومشكلة لوحده , دا من تبعيات العشوائية في التفكير والافعال