البيضة وقشرتها!!

قضيت يوم الجمعة الماضي بصحبة ابنة اختي "لولو" ذات الستة اعوام , شاركتها اللعب والحواديت وكل الاحاديث الطفولية الجميلة التي اعشقها ببرائتها و سحرها الخاص ..

ودا بيننا هذا الحوار الذي جعلني افكر كثيييييييرا طوال اليوم , اليكم ما دار بيننا:

**

هي: سنو.. ممكن تلاعبيني البيضة؟

انا : انتي كبرتي عليها يا لولو

هي : لا لا انا ما كبرتش , لاعبيني البيضة علشان خاطري يا سنو علشان خاطري , علشان خاطري

أنا: طيب طيب خلاص, هاتي ايدك ..

ادي البيضة , وادي اللي شواها , وادي اللي قشرها وادي اللي اكلها .. وادي ال.....

هي : غلط غلط يا سنو , انتي بتقولي كدة غلط , انتي مش بتعرفي تلعبيها

أنا: ليه يا لولو , هي كدة

هي : لا مش كدة انتي مش بتعرفي

أنا : طيب قوليلي ازاي

هي: هاتي ايدك يا سنو..

ادي البيضة وادي اللي لقاها , وادي اللي قشرها , وادي اللي شواها وادي اللي اكلها

انا : ازاي يا لولو يقشرها الأول وبعدين يشويها مش احنا الاول بنسلق البيضة وبعدين نقشرها

هي : لا لازم نقشرها الاول وبعدين نشويها , ازاي يعني هنشويها بقشرتها , مش لما بنعمل بيضة عيون بنقشرها الأول وبعدين نسويها..

انا : أه يا لولو بس احنا مش بنشوي البيض ولو شويناه أكيد هنسلقه الأول

هي : لا مش هنسلقه الأول احنا نقشره علشان نعرف نسويه علي النار

**

دخلت انا ولولو في جدال استمر فترة من الوقت انتهي بهزيمتي , او ربما اقتناعي بوجهة نظر "لولو" فهي تري الموضوع من وجهة نظر مختلفة عن تلك التي اراه انا بها , من قال ان المنطق لا يقبل القسمة علي اثنين , من قال ان هناك رأي منطقي واخر غير منطقي , منطقي بالنسبة اليك ام بالنسبة الي غيرك!!

ربما أقنعك ولكنه ربما لم يقنع غيرك أيضاً.

**

لقد جعلتني لولو أدرك أن هناك بعض من الحقائق التي نأخذها مُسلّم بها دون أن نفكر فيها ودون ان نناقشها حتي مع انفسنا , أدركت أيضاً أننا نقبل الواقع ونتعامل معه كحقيقة ثابتة وربما اكتشفنا بعد حين انه لم يكن الا من صنعنا نحن واوهامنا نحن , ونحن فقط.

**

المشكلة لا تكمن في ال"بيضة" ولا في "قشرتها" وانما فيمن يتعاملون معها , في عقولنا نحن وتعاملنا مع الامور, لقد تعاملت مع لولو بسياسة الرأي والرأي الأخر , حاولت عرض رأيي واستمعت لرأيها في انصات تام وفي تفكر كامل , مع الاختلاف الشاسع بيننا في العمر والخبرة والتفكير , ولكن أحيانا يري مَن دونك اشياء لا تراها انت , انها وجهة النظر , المنظور الاخر للامور , وقد انتهي الأمر بان اقتنعت بوجهة نظرها ولم اجد مشكلة في ذلك فيمكننا تقشير البيضة اولا أو شيّها أولا ثم تقشيرها بعد ذلك , ليس هذا ما يهم ..

المهم هو ان نأكل البيضة سويّاً في النهاية.

أليس كذلك؟!