الأربعاء، أبريل 16، 2008

عملاتنا الورقية الي اين؟!!

-1-
اوقعني حظي البائس في ورقة من فئة العشرة جنيهات المصرية فتوقفت وهي بيدي ونظرت اليها نظرة طوييييلة تبعها تجهم وعبوس بوجهي انعكس علي كل من حولي فسألوني:
العشرة جنيه مزعلاكي ولا ايه؟!
والحقيقة لم أشأ أن أكذب فأجبت:
أيوة مزعلاني طبعا
***
في البداية اعتقدت انها كانت مع طالب في الامتحان ومن الواضح انه امتحان صعب افقده اعصابه فانهال علي قلمه المسكين الذي انتهي حبره فاصر الطالب ان يستخرج منه الحبر علي ورقة العشرة جنيهات,
**
أو ان احدهم كان ينوي كتابة قصيدة شعرية او ذكري ابدية مادية ولكن ابي قلمه ان يكتب حرفاً فأصر هو ودخل في معركة حامية مع القلم وكانت ساحة المعركة هي ورقة العشرة جنيهات الي ان استسلم صاحب القلم ورضي بترك القلم والورقة في حالهما بعد ان اصبحت العشرة جنيهات عبارة عن عشرات من الخطوط المتقاطعة اخفت معالمها.
**
لا اعلم كيف يسمح بتداول مثل هذه الورقات؟!
ولماذا لا يمنع التعامل بها وفتح منافذ سهلة التعامل لاجبار المواطنين علي تغييرها من البنك؟؟
**
رايت أكثر من عملة ورقية لدول مختلفة فلم أصدق انها متداولة كعملاتنا ظننت انها خارجة من البنك لتوها بسبب ما رايت من قذارة علي عملاتنا الورقية.
**
من نظرتي للورقة ادركت بند اخر اضيفه لأسباب اتهامنا بالعشوائية والهمجية , فشعب يتعامل مع العملات الورقية بهذه الطريقة فليس من الغريب ان تكون سلوكياته كلها بنفس الطريقة.
**
ومن مدونة سنووايت
اناشد السادة المسئولين بالنظر في ما يتعلق بسحب جميع العملات المماثلة واستبدالها باخري جديدة نظيفة حضارية ادمية.
وأناشد أفراد الشعب المصري بالتعاطف مع العملات الورقية لانها مظهر حضاري يعكس ذوقنا واحترامنا لممتلكاتنا
فلنترك امور "الشخابيط" للاطفال الي ان يتعلموا منا ومن سلوكياتنا وتطبيقاً لنصائح نانسي عجرم
"عايز ترسم ارسم لكن من غير ما تشخبط علي اي حاجة"
**
-2-
هل تعامل أي منكم مع الورقة فئة المائتي جنيه؟؟
سؤالي هو : كيف تحتفظ بها في محفظتك؟؟
وسؤالي الاخر : لماذا ورقة المائتي جنيه بالذات بهذا الحجم؟؟
هل مثلا مساحة الورقة تدل علي زيادة قيمتها؟؟
اذا كان كذلك فلماذا لا يتم نفخ ورقة الجنيه فتصير بعرض ورقة الفلوسكاب فربما زاد ذلك من قيمة الجنيه الاخذة في التلاشي!!
سؤالي الأخير : متي سيتم اصدار ورقة فئة الالف جنيها؟؟!

هناك 13 تعليقًا:

الفارس الملثم يقول...

انا متهيالي احنا من اكتر الشعوب اللي غاوية تكتب حاجات غريبة علي الاوراق النقدية " قلة ورق يعني " انا راي الموضوع ده ليه ابعاد نفسية متشعبة منها, عدم احترام للعملة الوطنية بعدما فقدت قيمتها وهيبتها امام جميع العملات المعروفة , والله يرحم ايام ما كان الجنيه المصري يتهزله الاسترليني والدولار ..

وومكن كمان زي ما قلتي نوع من الفوضوية والعشوائية الموجودة جوانا ..

ولا عزاء للعملة المصرية

تحياتي
محمد

Tamer Nabil Moussa يقول...

كلامك مظبوط

الحكاية دى كبرت اوى ولازم يكون لها حل

منظر غير حضارى لينا وقدام الاخرين من البلاد الاخرى


تحياتى

wanna b a physician يقول...

طب انا مرة سحبت فلوس من بنك ادانى خمسات مقطعه ومتهالكه تخيلى البنك نفسه كدا ده شعب عجيب بيكتب على كل حاجة مش بس الفلوس كراسى الاتوبيس الحيطان
بالنسبة للمائتى جنية طبعا لا لانها كبيرة جدا اشيلها ازاى
اما الالف فلما يجى الملك هيعملها
تحياتى

فاتيما يقول...

إيه يا سنووايت دا
انتى بتعملى بولبولة فى الأمن العام بالسؤالين الآخرنيين دول
ورقة بماتين جنيه إيه دى اللى هنتحير فى شيلها ؟
هوه حد بيشوفه خالص يا بنتى ...
وكمان الورقة ام ألف ...
لأ بقى طب دى هتتشاف فين الا إذا سرقنا بنك ...
و متطلعيهاش فى دماغى انا ساكنة فى شارع كله بنوك و الشيطان شاطر و معاه شهادات ...
بصى يا ستى التعامل مع الأوراق النقدية دى ثقافة عامة ...و عادى الواحد يكتب كلمات للذكرى مثلا بس الشخبطة المريعة دى من الغيظ يا سنونو غالبا يعنى
و فى الآخر انتى جبيتى من الآخر ..
لا فض فوه نانسى
هيا لخصت الحل و انتى شاورتى عليه
و علم و هننفذ يا فندم

dr_modymodak يقول...

هههههههه زي العسل الموضوع ده يا سنو الواحد مش عارف يضحك ولا يتحسر علي حالنا

بس بيني وبينك الشعب المصري ده دمه زي العسل الواحد بيشوف حاجات غريبه

ومكدبش عليكي انا من الناس اللي احيانا بكتب علي الورق النقدي

وشايف تعليقات منظر غير حضاري ولازم وقفه ههههه وقفة ايه يا جماعه انتوا مش عارفين الجنيه بتع وصل لفين الوقفه ازاي نخلي الجنيه ليه قيمه

اما حكاية الورقه اللي ب 200 ج عن نفسي صعب اشيلها معايا دا لو معايا يعني

قولي يارب

د/اجدع بنوته يقول...

ياعينىىىىى

الف حنيه ايه يابنتى

ده ف ناس متعرفش ان فيه ورقه بميتين جنيه

ههههههههههههههههههههههههههههههههههه

وانا انشاد معاكى المسئومين برده

بس النظريه ان محدش بقى لاقى الفلوس اصلاا

علشان يكتبوا عليها

موناليزا يقول...

انا برضه لفت نظرى ان ورقة فئة 200 جنية كبيرة اوى يمكن عشان نساعد الناس على الكتابة براحتهم ههههههههه
بجد موضوع مميز والمدونة كلها جميلة اوى دى اول مرة ازورها ولفتت نظرى بمواضيعها وبرسوماتك الجميلة
بالتوفيق دائما
تقبلى مرورى

Hossam Nasr يقول...

السيدة الكريمة

تابعي على مدونة قولاً سديداً رد الحكومة الهولندية على حملة المدونة لدعوة الحكومة الهولندية لسن قوانين ردعية تمنع حدوث الإستهزاء بالمقدسات الدينية ورد المدونة عليهم على الربط التالي
http://kawlansadida.blogspot.com/2008/04/blog-post_18.html

وجزاكم الله عن نبيكم خيراً

Omar El-Tahan يقول...

لي قريب يعمل في أحد البنوك وعندما سألته نفس سؤالك الحائر حول استبدال النقود التالفة نظر لي طويلاً وكأنه يشك في قواي العقلية و قال لي:

فلوس قديمة أيه ومقطعة ايه اللي بتقوللي عليها ... احنا عندنا تعليمات ان اللي يكتشف ورق مزور في فلوس داخلة البنك يحطها في وسط ورق تاني طالع لعميل تاني عشان الموضوع لو مشي رسمي لازم يتتبعوا أثر الورق ده لحد ايام امنمحات.

ومع بيروقراطتيتنا العظيمة ده كفيل بخراب بيت البنك عشان 10 جنيه مضروبة .. فمن باب إيثار السلامة يتم تلزيقها لزبون تاني وزغرطي ياللي مانتيش داريانة.

ده جزء من المشكلة ... أما الجزء التاني فهو سلوك الشعب وثقافته التخريبية الحاقدة على كل شيء ... وللأسف من الغلب والتعليم اللي بيفسد مش بيعلم ...

وطبعاً لما الاقي شاب طول بعرض يقوم مطلع من جيبه مباشرة كلكيعة فلوس "بمعنى الكلمة" ويقعد يفرد فيها عشان يطلع من وسط الميات والخمسينات "والمتينات" حبة فكة يحاسب بيهم تبقى مصيبة .. خاصة لما يكون ده شاب جامعي ولا موظف مفروض انه محترم في شركة تبقى دي ثقافة شعب ...

ولما الاقي واحد عايز يدفع فلوس ويطلعها من جيبه "كلكيعة برضه" ويقعد يفرد الورقة ويحاول ينشفها من عرقه عشان يديها للراجل تبقى وكسة.

ولما تلاقي عربية شبح ولا لاند روفر أو بي إم فئة خامسة ويتفتح شباكها وهوبااااا حبة قشر موز ولا كيس زبالة في وسط الشارع ... تبقى انت اكيد اكيد في مصر.

احنا محتاجين نتعلم ازاي نحب نفسنا الأول وبعد كده لما نتصالح مع أنفسنا هانحب بلدنا وهانحب حاجات تانية كتير ... إحنا شعب بيكره نفسه ولازم نتعالج من النقطة دي الأول.

Mafrousa يقول...

سنووايت
-------
الاول قبل ما ابدا كلامى لا تفتحى dumuro لانها فيروس انا دخلت فيا عند مدونه بنوته مصريه.. و لجل ستر ربك .. البرنامج صدها .. فخدى بالك
---------------------------------
المهم... الفلوس بتاعتنا ذات قيمه عاليه جدا اوعى تقولى غير كده ..ده من شدة احترامها الناس بتسجل اسمها و لحظاتها الجميله عليها.. و ذلك للتاريخ ... مش الفراعنه سايبين اسمائهم ...امال انتى فاكره ايه...!!!!
ومالها الورقه ام 200 جنيه مزعلاكى ليه مش عارفه تشليها فى محفظتك ...اختك مفروسه ممكن تشلهالك فى الحفظ و الصون .. بس انتى لايمينى عليها و انا اشيلها جوه حباب اعنيا......
و بعدين ايه الافكار اللى ما تسرش ديه ..تفى من بقك..تفى....تفيتى؟
عاوزه الالف جنيه تبقى ورقه واحده ...حرام عليكى ...ده لو جه اليوم المنقرش ده و الالف جنيه بقت و رقه واحده ...حتكون خلاص القيامه قربت...لا بجد حتبقى قربت قوى مش زى دلوقتى .....
سبلام...و بلاش الحقد على ال 10 جنيه و ال 200 جنيه...عندك ال 100 جنيه ملهاش لزمه ازعلى منها زى ما انتى عاوزه

WhItE HeArT يقول...

ربنا يسهــــــــــــل

عملاتنا الورقيه الى اي شيء غير التقدم ابدا احنا بلد كده اصلا كل حاجة بترجع خايفين ننام ونصحى نلاقينا رجنا كي جي تو

تحياتي

الجعرّ و أبورمّانة يقول...

يااااااااه..
هيا دي بأة العشرة جنيه اللي بيقولو عليها؟؟

بالنسبة للمتين جنيه..أتلايم عليها بس ومالكيش دعوة أنا هاعرف أشيلها..

الجعرّ

dodda يقول...

ورقه بالف جنيه؟؟؟
دى زى اللى اشترى التروماى كده!!!

انا معاكى ان الاوراق النقديه لازم تتعامل احسن من كده

ورقه بالف جنيه!!!
ودى تبقى اد السرير بقى والا ايه؟؟؟